Во Македонија е потврден случај на денга треска кај 42-годишен маж од Бангладеш, кој допатувал во земјата поради работни обврски.
Директорот на Клиниката за инфективни болести, д-р Фадил Цана, денеска информираше дека случајот е лабораториски потврден врз основа на анализи извршени на Клиниката за инфективни болести во Скопје и во Институтот за јавно здравје.
Пациентот е хоспитализиран на Клиниката за инфективни болести и, според лекарските информации, се наоѓа во стабилна здравствена состојба и е под постојан медицински надзор.
Денга треска е вирусно заболување кое се пренесува преку каснување од заразени комарци од родот Aedes. Болеста не се пренесува директно од човек на човек, туку преку вектор – заразен комарец кој претходно каснал инфицирано лице.
Најчестите симптоми вклучуваат нагла висока температура, силна главоболка, болки во мускули и зглобови, болка зад очите, замор, гадење, повраќање и појава на осип. Пациентите често опишуваат и изразена болка во телото со чувство „како да им се кршат коските“, што е една од карактеристичните манифестации на болеста.
Во одредени случаи, болеста може да премине во потешка форма со крварења и сериозни компликации.
Специфичен лек за денга треска не постои, па третманот е главно симптоматски. Тој вклучува одмор, внесување течности, лекови за намалување на температурата како парацетамол, како и внимателно медицинско следење на пациентите, особено кај потешките случаи.
Здравствените власти апелираат на внимателност, но нагласуваат дека најголем дел од случаите завршуваат со целосно закрепнување.
