Документарниот филм „Приказната за Силјан“ на македонската режисерка Тамара Котевска доби две номинации за престижните телевизиски награди „Еми“, што претставува уште едно значајно меѓународно признание за македонската документаристика.
Филмот е номиниран во две категории, со што продолжува успешниот меѓународен пат на Котевска, која веќе се етаблира како една од најпрепознатливите македонски авторки на светската документарна сцена.
Првата номинација е во категоријата „Exceptional Merit in Documentary Filmmaking“ (Исклучителна вредност во документарното филмско творештво), која им се доделува на остварувања со исклучителен авторски пристап, уметничка вредност и значајно општествено влијание.
Втората номинација е во категоријата „Outstanding Cinematography for a Nonfiction Program“ (Извонредна кинематографија за документарна програма), како признание за впечатливата визуелна естетика на филмот и работата на директорот на фотографија Жан Дакар (Jean Dakar). Неговата кинематографија, преку внимателно обликувани кадри, ја доловува интимната приказна за човекот, природата и преживувањето, претворајќи ја во силно и емотивно филмско искуство.
Номинациите претставуваат уште еден значаен меѓународен успех за Тамара Котевска, која и по историскиот успех на „Медена земја“ продолжува да создава документарни филмови што освојуваат признанија на највисоко светско ниво. Воедно, тие се потврда за сè поголемата видливост на македонската документарна продукција и нејзината способност да допре до глобалната публика преку универзални човечки приказни, раскажани со автентичен авторски израз и врвна филмска естетика.
Добитниците на 46. издание на наградите „Еми“ во категориите за вести и документарна програма ќе бидат соопштени на свечената церемонија што ќе се одржи оваа есен во Њујорк.