Необична сцена беше забележана во морето кај Палиури, на првиот крак на Халкидики, каде што во близина на брегот се појави голем кит долг околу 10 метри.
Животното било снимено од рибар кој во моментот се наоѓал во морето. Видеото брзо привлече внимание, бидејќи ретко се случува ваков голем морски цицач да биде забележан толку блиску до популарните плажи во регионот.
Според морските експерти, станува збор за кашалот – вид кит познат по својата големина и карактеристичниот изглед. Кашалотите најчесто се движат во подлабоки води, но понекогаш можат да се приближат до крајбрежните подрачја.
Појавата на китот кај Палиури предизвика голем интерес кај мештаните и туристите, но надлежните потсетуваат дека при средба со вакви животни треба да се одржува безбедна дистанца и да не се нарушува нивното движење.
Снимката од Халкидики се прошири на социјалните мрежи и повторно го привлече вниманието кон богатството на морскиот свет во Егејското Море.
